السلام عليكم
الكلام ده نقلا عن بنت في الصف الاول الثانوي
ملحوظة / البنت دي مصرية مية في المية

اقتباس :

السلام عليكم
أسعد الله أوقاتكم بكل خيـر

اولاً اعتذر مقدماً ان كلامى ممكن ما يكونش منظم اوى وكمان حيكون بالعاميه

انا فكرت ليه مانعملش حمله ونسميها " غير نفسك "

بختصار يا جماعه ، الثوره اللى حصلت كانت ثوره سياسه ، لكن احنا محتاجين لـ ثوره اخلاقيه وثوره تربويه

وعلشان كده انا قرر انى اعمل حاجه وبالفعل بدأت فيها ونفسى كلنا نعملها وهى عباره عن حمله تحت مسمى " غير نفسك "

وطبعا الفكره جت لى من فتره ومن تجميع لموضوعات اخرهم امبارح وهو موضوع حلم صغير لـ سمر سعد وموضوع كان الاسبوع الماضى لـ أمجد


أى حمله دايماً بتبدأ من الفيس بوك وبعد كده المواقع ، لكن المره دى حتكون مختلفه حتبدأ من موقع وبعد كده على الفيس بوك

دايماً بنقول عايزين نتغير ، بس لو كل واحد قال عايزين نتغير محدش يتغير ، لكن لو كل واحد غير نفسه حنتغير كلنا

يعنى بختصار حنعمل ايه ؟

الحمله
حتكون عباره عن : اننا نكتب ورق ونوزعه على الناس فى الشارع ، علشان نغير
فكره معينه او نعلمهم حاجه معينه مش شرط سياسه لا ممكن تكون اجتماعيه او
اقتصاديه...ألخ

كل يوم او اسبوع على حسب رغبتكم حنختار موضوع معين نتكلم عليه
وحنطبع منه 50 ورقه ونوزعها على الناس فى الشارع

الفكره دى انا حابها اوى وحاسه انى حساعد بيها فى تغير بلدى حبيبتى

كفايه انى ما نزلتش ايام الثوره
وكمان بعدها

نفسى احس انى عملت حاجه
ومن غير ما اكلف نفسى او حتى اتعب او ارغم اهلى انى انزل الشارع يومياً

نفسى بجد كلنا نشوف الحمله بطريقه ايجابيه

نفسى كلنا نتغير

بس قبل ما نغير غيرنا عايزين نغير نفسنا الآول
بمعنى : ماينفعش انا اقول حاجه للناس وانا نفسى مش بعملها

وانا اختارت اول حلقه من الحمله تكون عن صله الرحم

لان انا كنت فاهمها غلط وكمان أكيد معظم الناس فاهمها غلط خالص

انا كتبت الورقه وعايزكم انتوا كمان تكتبوها

بس الآول عايزه اعرف رأيكم معايا ولا لا؟

نفسى بجد كلنا نبقى مع بعض فى حمله " غير نفسك "

ونعمل لنفسنا شعار " ابدأ بنفسك "

ان شاء الله حتنجح لو نفذنها صح


ودلوقتى حابه اسمع كل اقتراحتكم وكمان لو اى حد ليه تعليق او اضافه ياريت يقول
علشان عايزين نبدأ على طول

مش عايزين نضيع وقت اكتر من كده


وياريت لو الموضوع عاجبكم يتثبت للأهميه

تحياتى لكم ،،،،،