السلام عليكم ورحمة الله وبركاته




مساكم كما تحبون~


قريت هالموضوع في احد المواقع وحبيت انقله نتناقش فيه




بدخل بصلب الموضوع لاني بصراحه مااجيد المقدمات..




احنا العرب سلبيين بصوره انا نفسي مااتصورها
قبل 5 شهور اشتركت باليوتيوب ..واصلا من قبل كنت دايم اتفرج على مقاطع فيه
واللي يلفتني بجد هو ردودنا اللي توصل للآلاف
وهذا شي جيد ومعناه ان المقطع مرغوب فيه ولاقى اقبال كبير
لكن مو العبره بعدد الردود ومين رد!!
العبره تكمن في نوعية الردود
كلها سب وشتم وطائفيه وتعصب
بكل شي بالكوره
بالفن
بالدين
بالسياسه
حتى بمقاطع الكرتون اللي كلهم براءه بعد تلاقي ردود سافله ^_^
العجيب اصلا مره دخلت مقطع اجنبي وهم بعد لقيت فيه ردود عربيه كلها الفاظ وسخه!!!
على عكس الاجانب ايا كانوا تلاقي ردودهم كلها نقاش وجديه واقتراحات او انتقاد بناء هادف
وماانكر ان فيه منهم شاذين عن القاعده بس مايوصلون عددنا

ابغى اعرف احنا ليه كذا نفوسنا على بعض؟
متى بنتعلم ان الدنيا هذي فانيه وان كل كلمه نكتبها محاسبين عليها في الآخره؟؟
ليش احنا شاطرين من ورى الشاشه بالكلام البذيئ والمشادات الكلاميه اللي مامنها فايده؟
واجزم ان كل الكلام المكتوب مانقدر نقوله لبعض وجها لوجه


انا شخصيا ماانكر اني ممكن ادخل مع المجموعه خاصه اذا الموضوع استفزني رغم اني احاول ماارد

لكن فيه ناس هذا منهجم على طول

خلني اعطيكم امثله بسيطه على كلامي
خلافات بين سنه وشيعه وهذي الي مالها حل صراحه *_^
خلافات بين جمهور الهلال والنصر
تلاقون الناس كلهم طايحين بحليمه بولند وخاقين معها ومن عرفوا انها ايرانيه حقدوا عليها
هيفا وهبي حتى اللي ببطن امه خق عليها ومن دروا انها شيعيه سفلوا فيها
برامج المسابقات الغنائيه وشوف كيف كل واحد يتعصب للنجم اللي يحبه

وفوق هذا كله الردود تكثر بمواضيع اللي فيها فضايح , اشاعه , صور مخله , اغاني
ولو نزل مقطع عن تعليم شي او مقطع مفيد ماتلاقي فيه ولا رد واحد ولا حتى ع الاقل ديسلايك واحد

انا هنا مو جايه افرض رايي على الناس وانهيهم عن شي واجبرهم يتكلمون بطريقه معينه
بس خل تكون ردودنا مناسبه للموضوع
يعني اذا مافيه رقيب عليك انت خلك رقيب نفسك




وربي يسعدكم على طول ويهدي بالكم